مراقبے کے جب کمالات کھلیں گے تو حیرت کا انوکھا جہان اور مشکلات کا سو فیصد حل خود آپ کو حیرت زدہ کر دے گا۔

Meditation یعنی مراقبہ جہاں ازل سے روحانیت کی ترقی اور مشکلات کے حل کا علاج رہا ہے وہاں جدید سائنس نے اسے امراض کا یقینی علاج بھی قرار دیا ہے۔ ہزاروں تجربات کے بعد عبقری کے قارئین کے لئے مراقبے سے علاج پیش خدمت ہے۔ سوتے وقت اگر با وضو اور پاک سوئیں تو سب سے بہتر ورنہ کسی بھی حالت میں صرف 10 منٹ بستر پر بیٹھ کر بلا تعدادبِسْمِ اللہِ الرَّحْمٰنِ الرَّحِیْمِ پڑھیں۔ اول و آخر 3 بار درود شریف پڑھیں پھر لیٹ جائیں۔ جس مرض کا خاتمہ یا الجھن کا حل چاہتے ہوں اس کو ذہن میں رکھ کر یہ تصور کریں کہ ’’ آسمان سے سنہرے رنگ کی روشنی میرے سر سے سارے جسم میں داخل ہو کر اس مرض کو ختم یا الجھن کو حل کر رہی ہے اور اس وظیفے کی برکت سے میں سو فیصداس پریشانی سے نکل گیا/گئی ہوں‘‘ یہاں تک کہ اس تصور کو دہراتے دہراتے نیند آجائے۔ شروع میں تصور بناتے ہوئے آپکو مشکل ہو گی لیکن بعد میں آپ پر جب اس کے کمالات کھلیں گے تو حیرت کا انوکھا جہان اور مشکلات کا سو فیصد حل خود آپ کو حیرت زدہ کر دیگا۔ مراقبے کے تجربات ہمیں لکھنا نہ بھولیں۔ 

مراقبہ نے زندگی میں سکون بھردیا
محترم حضرت حکیم صاحب السلام علیکم! اللہ رب العزت آپ سے یوں ہی دین کی خدمت لیتے رہیں اور آپ کا سایہ ہمارے سروں پر قائم رکھے۔ آمین!عبقری رسالہ بہت شوق سے پڑھتی ہوں۔ اس میں موجود چھوٹےسے عمل ’’مراقبہ‘‘ نے میری زندگی میں سکون بھر دیا ہے۔ مجھے بواسیر کی سخت تکلیف تھی‘ موہکے بنے ہوئے تھے‘ جب واش روم آتا‘ مجھے موت نظر آتی‘ میری ایک دوست نے مجھے مراقبہ کے متعلق بتایا‘ میں نے بتائے گئے طریقے پر مراقبہ کرنا شروع کردیا‘حالانکہ ابھی میرا تصور بھی صحیح بننا شروع نہیں ہواتھا اس کے باوجود رب کا کرم ہوا اور میری عرصہ پرانی بواسیر صرف دو دنوں میں ہی ٹھیک ہوگئی۔ الحمدللہ! اب میں بڑی سہولت کے ساتھ بیت الخلاء سے فارغ ہوجاتی ہوں۔ اب تو مجھے کوئی مسئلہ‘ کوئی مجبوری‘ کوئی الجھن ہو سخت تصور کے ساتھ مراقبہ کرتی ہوں اللہ رب العزت کی مدد آجاتی ہے۔ (ج، گجرات)